政情：田少哪吒師徒決裂
自由黨內部人事問題一浪接一浪，原中常委田北辰退黨，恩怨是非沒完沒了，事件都未知點收科，又爆出「家庭糾紛」！該黨最有望進軍直選嘅第二梯隊方國珊，前日同被傳有意重返新界東出選嘅前主席田北俊以及地區人士開會後，以「地區工作理念同高層有鴻溝」為由，劈炮辭去該黨新界東支部主席一職，只保留黨員身份，令本已飽受人事紛爭困擾嘅自由黨，內部形勢更加動盪難安。
今次導火線係前日兩名黨內元老田少同「莎姐」周梁淑怡喺自由黨總部分別會見四個地區支部骨幹，商討加強地區工作，有傳「哪吒」方國珊當場被人大罵，之後隨即喺傍晚向總部辭去新東主席職務。呢個消息，對近期因田二少退黨而內部士氣受挫嘅自由黨嚟講，無疑係雪上加霜，尤其田少同哪吒素被視為「師徒」搭檔，二人忽然霎氣決裂，情況更唔尋常。
目前未諗退黨
哪吒證實劈炮消息，但否認被罵，稱只係同田少喺會上「有少少火花」，具體詳情無謂再提，總之覺得自己想做地區工作，但「同黨嘅步伐節奏有距離」，心情複雜兼難過。哪吒仲話，與高層嘅距離，非一朝一夕形成，早喺去年初佢抗議恒生銀行向客戶強推電子帳單措施一役中，黨內高層勸喻收手，當時佢已覺得直選理念同黨高層有鴻溝，但目前未諗退黨呢一步。
據悉，田少前日同新東支部骨幹見面時，明言「以後會睇多啲新界東」，又對哪吒嘅地區工作有微言，批評立法會直選「唔係派單張咁簡單」，希望哪吒多做提升商界形象嘅事情。田少同哪吒關係一向唔錯，依家田少突然對新東「睇緊咗」，唔知同盛傳佢部署再戰新東有冇關係？
哪吒遞大信封，自由黨人都大感錯愕，擔心會進一步打擊黨內士氣，影響二○一二年選情，令自由黨直選之路更難行。所以有黨員估計，高層未來幾日將全力挽留哪吒繼續執掌新東支部，穩定軍心。
身兼旅發局主席嘅田少尋日出席文化旅遊博覽，記者想叫佢回應哪吒劈炮一事，但佢透過旅發局發言人稱，尋日唔回應政治問題。自由黨主席劉健儀亦話，未收到哪吒嘅退黨通知，要了解事情後再作評論。睇嚟自由黨高層想謀定後動，思索如何收拾殘局。