講起領匯，係人都一肚火，自領匯接手管理大部分屋邨商場及停車場之後，負面新聞幾乎無日無之，早已經激起咗民憤。有多個關注團體忍無可忍，狂數領匯七宗罪，準備今日直踩領匯股東周年大會會場，要求管理層檢討依家嘅管理手法，佢哋仲聲言如果冇合理回覆，唔排除會有進一步行動。

其實七宗罪邊度夠數齊領匯啲衰嘢呀？計功夫茶話齋，領匯最大一宗罪，就係喺金融海嘯嘅衝擊之下，唔理小商戶經營嘅苦況，仍然獅子大開口瘋狂加租。好似話沙田瀝源邨商場一間時裝店，最近一加就加咗百分之一百四十五。喂，市道好嗰陣都夠惡頂啦，更何況家陣市況差到貼地，咁加法，即係叫人唔使做生意嘅啫，等於要逼死小商戶啫！話口未完，最近真係有人以死控訴領匯出賣小商戶！

話說○六年中樂富中心一帶商舖先後進行大翻新，有位茶餐廳老闆捱義氣代表商戶與領匯交涉，對方仲承諾翻新後唔會勁加租，誰不知領匯誓願當食生菜，話反口就反口，租金狂加不特止，場內宣傳配套又唔掂。呢位茶餐廳老闆懷疑愧對街坊，本月中於寓所跳樓身亡。領匯不殺伯仁，伯仁卻因領匯而死，呢宗罪，領匯真係水洗都唔清呀！

領匯另一宗大罪，就係剝削員工最叻。領匯曾承諾外判員工嘅每月工資水平唔會低於某個水平，話就話如果外判商違規，會立即採取適當行動。不過有關注組織發現，領匯旗下商場及停車場外判商不斷炒保安員，冇炒嘅就要身兼數職，即係等於變相減薪。

所以呢，唔好以為加咗租，服務就好咗噃，領匯轄下嘅停車場收費至今已經加咗無數次，之但係服務仲衰過之前。有調查發現有好多受訪車主唔滿意領匯停車場設施，成日有人喺停車場梯間便溺冇人理唔在講，最離譜嘅係，領匯停車場好似無掩雞籠咁，汽車音響都畀人偷走埋，可能泊街仲安全啲。

講到尾，呢隻貪得無厭嘅領匯怪物完全係由當局一手一腳造出嚟，如果政府當年唔係為卸包袱而將領匯上市，之後關人個關闊佬懶理，又點會養到領匯今時今日咁惡死，不斷殘民自肥吖！

有冇聽過一句叫「皮之不存，毛將焉附」呀？政府如果再縱容領匯繼續殺雞取卵，小商戶畀佢逼到走投無路，班員工畀佢搞到冇啖好食，引爆社會炸彈，到時睇吓班高官點埋尾！