上星期五肥胡朝早返廣州開會，中午趕返落嚟撐斌仔，分享完自己嘅失敗經驗之後，傍晚又撲返上廣州，星期六先至返港，認真風塵僕僕！不過去到書展，無理由空手而回，肥胡同我哋講，平時鍾意睇書，而且睇得雜，當日佢嘅買書清單，就有唐詩、《紅樓夢》漫畫版、張愛玲《小團圓》，連張小嫻嘅小說亦唔放過，英文版《易經》都有一本。肥胡梗唔少得買番本斌仔嘅新書《總有一次失敗》啦，佢一早預訂咗八本，去書展嗰日仲特登買多十本，帶上廣州做手信添。肥胡話，睇書係消磨時間最好方法，搭飛機睇書，就最啱佢呢種搭飛機多過坐巴士嘅人。