劉先生一家三口獲編配東涌逸東邨悅逸樓一單位，以為有個安樂窩。未料六月中旬收樓並完成裝修後，甫打開信箱即被大疊分別來自電訊公司、銀行、政府部門，甚至房署發出的催租通知等追數信嚇至目瞪口呆。及至入伙後雖然使用新登記電話，惟仍然有滋擾來電，「唔知點解改咗電話都會打到嚟，總之打嚟唔出聲，又冇來電顯示，有時仲會三更半夜打嚟，搞到冇覺好瞓！」

隱瞞紀錄 監督不力

為謹慎起見，劉入伙前曾向物業服務辦事處職員查詢，一直未獲知會前住戶有欠債紀錄，懷疑房署與管理公司刻意隱瞞，「有咩理由上手冇交幾個月租，仲有大堆追數信，房署仲可以話（獲配單位）冇欠債？」劉坦言目前最擔心的仍是收數公司上門滋擾，「使咗成五萬幾蚊裝修，依家搬又唔係，唔搬又唔係！」

大嶼山居民協會秘書郭平承認，邨內住戶欠債及申請調遷情況甚為普遍，去年已接獲逾廿宗欠債住戶求助，但入伙後才得悉前住戶欠債的個案卻較為罕見，「邊個單位欠債，房署同管理公司理論上會有紀錄，冇咩理由check（查）唔到？」郭平認為事件除反映管理公司職員驗收單位失誤，房署亦監督不力，「好多行政同埋管理都唔係管理公司可以做到，但房署外判咗就唔理，依家搞出個大頭佛，最慘嘅係啱啱住入去嘅人。」

驗收程序馬虎捱批

「明明有成疊追數信，連房署嘅欠租單都有埋，好明顯上手租戶個record（紀錄）花晒，咁都冇紀錄，房署同管理公司都有問題！」公屋聯會主席王坤說，房署應督促管理公司覆檢回收單位信箱，如有欠債紀錄，應將戶主已搬離消息知會「債主」。

對於被指驗收失誤一事，負責管理的卓安顧問有限公司發言人無正面回應，只稱一旦得悉單位曾被收數公司追數，會在新住戶簽訂租約前告知情況，惟上述單位並無曾被追數紀錄。發言人又說，可協助住戶將單位已轉租予新住戶的消息通知有關收數公司。

應錄音報警求助私隱署

新入伙住戶無辜被收數公司滋擾並非無法避免。法律界人士梁永鏗指出，準租戶有權向房署查問欠租紀錄，「有冇欠租房署一定知，成日拖租嘅人，欠街數嘅機會都大啲。」

梁指新住戶倘受收數公司滋擾，可立即報警，或由律師發信要求停止滋擾，凡遭受言語恐嚇者，更應立即錄音以作證據。倘問題持續，新住戶亦可透過別人欠債資料洩露予第三者為由，向個人資料私隱專員公署投訴，要求發出禁制令，阻止有關公司再向單位發出追數信件。

■記者　梅可茵