本文重點
憑《向左走‧向右走》紅遍中港台嘅台灣繪本作家幾米，尋日嚟咗香港出席一個兒童圖書頒獎禮，同大家分享吓創作心得，聽日仲會喺書展舉辦簽名會添。幾米嘅畫簡明得來有深義，大家對佢嘅創作過程都好有興趣，唔講唔知，原來佢係一邊聽歌，一邊作畫，咁聽咩歌呢？幾米披露咗個小秘密，原來佢多數聽流行曲同古典音樂，而佢最常聽嘅竟然係香港歌手陳奕迅嘅歌，事關佢囡囡都係陳奕迅歌迷喎。不過仲有個台灣歌手佢經常聽住嚟創作，嗰個就係張惠妹喇。
畫自己有興趣題目
不過，幾米好少喺佢十二歲嘅囡囡身上找尋創作靈感，反而會多啲留意身邊嘅事，或者睇多啲新聞同電影，畫番啲自己有興趣嘅題目。
雖然幾米好鍾意陳奕迅嘅歌，但居於台北嘅佢，唔係太了解香港嘅繪本發展，事關佢好少睇香港嘅繪本或者兒童文學，佢只係從朋友口中得知香港繪本嘅製作好認真，佢相信香港繪本會愈做愈好；幾米呢幾句話，都算好客套囉！