搭飛機多過食飯嘅太古（中國）主席陳南祿（Philip）一向旅遊見聞多，繼早前出版旅遊書後，尋日再度添食，出版第六本新作《美人美事》，齋睇書名以為Philip改行出書教人扮靚，睇真啲原來係推介遊歷美國嘅趣聞逸事至真，Philip喺簽名會上變身做「美人」，不過唔係「大美人李嘉欣」嗰隻，而係一身牛仔衫褲打扮，只差未騎埋上一隻蠻牛度，咁就似十足美國西部牛仔。
外父送訂製蛋糕
卓妮都係Philip「粉絲」，尋日貢去攞簽名，迎面而來見到Philip外父、美心集團創辦人伍沾德，Philip全家總動員出動打氣，除陳太外，公子陳卓俊、千金陳欣彤都排隊攞簽名。不過Philip好識做，見到外父駕到，一早簽定一本新作孝敬外父，外父亦禮尚往來，靜雞雞搵人訂製一個印有新書封面嘅蛋糕做賀禮，場面夠晒溫馨。前商務及經濟發展局局長馬時亨及立法會議員梁劉柔芬都爭住買本新書先睹為快。
最愛遊冷門國家
講番本書嘅創作靈感，Philip話多年來頻頻飛去美國公幹及旅行，見聞多到十日十夜都講唔完，索性將佢輯錄成書，等大家從另一角度體味美國文化。不過講到心中最愛嘅旅遊地點，原來唔係美國，而係港人較少去嘅冷門地點，例如伊朗、約旦等，貪佢夠晒神秘，最新目標係計劃去南美洲行吓喎。
子女都遺傳咗爸爸愛探險嘅性格，唔介意跟埋一齊去發掘異國風情，怪唔得阿囡對外國文化特別感興趣，話說尋日簽名會上巧遇「電器大王」蒙民偉公子蒙德揚，欣彤即場用日語同對方「過招」，蒙生雖然唔係日本人，但因跟隨爸爸同日本人經商多年，日語流利到令卓妮也嚇一跳。欣彤謙稱未係「日本通」，正努力學日語，反而爸爸嘅日文，比佢犀利好多喎。
Philip今次出書不忘做善事，本書嘅收益全數撥捐恩光之友會及國泰愛心兒童輪椅庫，自己一毫子都冇落袋。
卓妮