旺角又有亡命小巴釀成大車禍，搞到兩死八傷咁大劑。你以為態度囂張嘅殺人司機係超討厭咩？錯嘞，伊利沙伯醫院親身示範乜嘢叫做無敵超討厭，佢哋對其中一個命危女傷者王珮嘅家人講，嗱，有一隻藥，可以止血嘅，不過你哋要先畀二萬蚊，唔畀錢就冇。

嘩！香港公立醫院真係愈來愈無良㗎！你以為淨係明愛醫院先至做得出見死不救咩？又錯嘞，伊利沙伯醫院仲勁過明愛，唔止見死不救咁簡單，而係見錢先救，冇錢不救！

七十年代有一套電影《七十二家房客》，反映當時嘅社會時弊，其中有一幕係咁嘅，發生火警之後消防員嚟到，唔係第一時間救火，而係揸住支水喉向房客唱歌仔：有水有水，冇水冇水，有水放水，冇水散水！

勢估唔到，事隔三十年嘞，見錢先至救人呢支歌仔仲有得唱。唉，咁搞法，三十年前嘅公務員集體貪污會唔會再出現㗎？報警捉賊係咪又要畀錢㗎？

諗諗吓，以後搭小巴真係要帶多啲錢傍身，兩萬都未必夠。你知啦，亡命小巴牙煙到極，超速顯示器響到鬼殺咁嘈，司機可以完全當佢冇到，一個唔覺意撞車，血流成河死傷枕藉嘞，醫院就話先收兩皮嘢再幫你止血啫，你點知歪風會唔會感染救護員㗎？萬一救護員又話要收五千先至肯抬你上白車，去到醫院又話再收五千先至抬你落車，唔夠錢畀隨時命仔都冇埋！

醫管局終於知衰嘞，經過傳媒揭發醜聞之後，佢哋話喎，病人係唔會因為財政問題而得唔到治療嘅，所以車禍女傷者王珮嘅家人可以退還二萬蚊。

話時話，伊利沙伯醫院因乜解究先收錢後救人呢？原來醫管局有一套自購藥物名冊制度，貴價藥係要病人額外畀錢嘅，王珮需要嘅止血藥咁啱就係屬於自購藥物名冊。醫管局行政總裁蘇利民就發出聲明解釋嘞，事件反映現存制度嘅灰色地帶。

計功夫茶話齋，灰乜鬼嘢色地帶吖，根本就係醫護人員做事太官僚。就好似上次明愛醫院見死不救咁，佢哋話喎，成件事依足指引，職員叫心臟病發嘅病人自己打電話報警係冇錯嘅。同樣嘞，伊利沙伯醫院又係咁官僚，要用嘅藥列入自購藥物名冊吖嘛，咁就話之你死咯，一切按本子辦事，依足指引，收足你錢！

冇咯冇咯，一次係咁，兩次係咁，餐餐都係咁。仲話醫療係香港六大優勢產業之一？又話要將香港打造成優質醫療中心？自己呃自己好喇，千祈唔好對外宣揚，醜死怪呀！

講到尾，醫護人員既冷血又官僚，醫療失誤更加係多到嚇死人，香港公共醫療系統遲早冇得救！