豬流感（Ｈ１Ｎ１甲型流感）爆發令港人格外重視個人衞生，油尖旺區議會亦因衞生問題導致議員互罵嘅火爆場面。事緣上月二十一日，油尖旺區議會食物環境事務委員會討論豬流感對策，會議中途增選委員徐偉雄忽然開火話：「我上星期喺四樓電腦房見到有議員上網時除咗鞋，對腳戙喺電腦枱，仲一面摳鼻屎……」佢話呢個人做過油尖旺區議會主席，仲有相為證添。
當時現任油尖旺區議會主席鍾港武隨即點出嗰位失儀嘅議員正係民主派議員陳文佑，仲話早前都見過陳文佑「一腳踩櫈，一腳戙上枱」，同樣有相為證。當日陳文佑聽到同事嘅指控，即時大動肝火反駁：「我都有好多大家嘅醜態，係咪要放上網吖！」結果會議被迫中止，上述對話以會議紀錄被放上區議會官方網站。
事後問番陳文佑，佢唔否認做過上述不雅行為，仲解釋話：「我對鞋濕咗，除出嚟晾乾。」至於喺公眾場合「採礦」，佢就話：「我去完廁所用紙巾整理面容！」陳文佑仲怪責同事揭佢私隱：「議員之間係要互相監督，但佢哋咁樣影我相，就嚴重侵犯個人私隱！」佢擔心事件會令市民覺得區議會嘅質素低劣。
不過鍾港武就反唇相譏：「佢（陳文佑）做呢件事已經影響區議會形象！」鍾港武仲話，已有兩名議員向佢投訴陳文佑漠視公眾衞生，佢準備喺下次內會討論有關投訴，所以要影相為證。區議員係市民嘅楷模，理應以身作則，無論係陳文佑漠視衞生定還是鍾港武侵犯私隱，都有損區議會喺市民心目中嘅形象！