鏹水彈三炸旺角，狂徒逍遙法外，明剃政府眼眉。尋日喺中環撞到保安局局長李少光，自然追住佢嚟問，佢就為警方辦事不力解畫：「警方做緊嘢喇！」問佢有冇信心破案？佢諗咗一陣之後都係嗰句：「警方做緊嘢喇！」咁驚唔驚同類事件陸續有嚟？佢仍然一臉無奈話：「警方做緊嘢喇！」警方裝晒天眼，派出大批警員都仲未捉到人，即使調查進度真係有眉目，光哥都要繼續扮人肉錄音機，否則若然再次甩轆捉唔到人，到時警方又失威。希望警方今次做嘢有成果喇！