卓妮見田少買咗個紅腸叉燒瀨雙拼，但走紅腸變成淨叉燒瀨，再加杯凍咖啡，盛惠廿一元。下午茶餐分量向來好少，好似卓妮咁，女士們當午餐都勉強夠食，男人就肯定當攝牙罅，但田少就話碗叉燒瀨一啲都唔少嘢，事關佢同醫生傾過，上咗年紀唔可以食太飽，每餐食到七成飽就最健康，加上平時應酬多經常飲飲食食，所以食少少頂吓肚就算嘞！

「性價比」衡量食物

田少對叉燒情有獨鍾，一星期最少食兩次，皆因瘦豬肉無牛肉咁多脂肪，而叉燒因為燒過，所有油都逼晒出來，相對較為健康。講到快餐店同高級食肆分別，田少都唔敢造作，坦言兩者有好大分別，一分錢一分貨嘛，但佢就以「性價比」角度來衡量食物：「算啦，廿零蚊一個餐有嘢食有杯飲品，算係咁（抵食）㗎喇！」

身兼旅遊發展局主席嘅田少曾經講過，有錢食嘢可以有好多選擇，唔一定豪到要去高級餐廳，平平哋二十至三十元都可以食一餐，總之平有平食，貴有貴食，最緊要係食得健康。

卓妮