本文重點
任總搵夠退休嘅消息，喺市場同政壇流傳咗好一段時間，因此尋日港府正式作出公布，並沒有引起太大震盪同爭議。議員最關注嘅反而係任總嘅繼任人選同聘任程序。講得白啲，佢哋其實係睇唔過眼煲呔曾隻手遮天、任人唯親，欽點佢嘅頭馬家臣，出任呢個全球最高薪嘅央行行長職位。
最令立法會各黨派不滿嘅係，有關任命唔需要進行公開招聘，連薪酬同任期等基本資料亦係神神秘秘，仲黑暗過副局及政助嘅委任。有議員就威脅引用《基本法》向煲呔曾提出彈劾動議，無論最終能否通過，都足以令煲呔曾好唔得閒。
唔公開招聘 好難交代
今次出聲嘅唔單止係泛民主派，連建制派嘅自由黨主席劉健儀、工聯會潘佩璆、以至身兼行政會議成員嘅民建聯副主席劉江華，都認為呢個咁高薪同重要嘅職位，冇理由唔需要進行公開招聘，否則好難向啲寄咗過百封求職信都搵唔到工嘅基層失業市民交代。
指控瀆職 啟動機制
不過民主黨李永達就離譜咗啲，佢為求博出位同爭曝光，尋日中午本來只係話要彈劾負責任命金管局新總裁嘅財爺鬍鬚曾，唔公開招聘新人選，點知可能係講出嚟後傳媒都好有興趣，佢愈講愈興奮，又喺下午直情攞埋本《基本法》出嚟，將矛頭直指煲呔曾，話若然作為特區之首嘅煲呔曾拒絕為該職位進行公開招聘，佢會考慮引用《基本法》賦予立法會嘅尚方寶劍，以煲呔曾任人唯親等同瀆職為由，動議啟動彈劾特首機制。
根據《基本法》有關條文，有關動議只須全體議員四分一聯合提出，即係民主黨、公民黨、再加多一名泛民議員聯手，就已經夠票玩嘢。不過動議要取得過半數，先至可以就特首瀆職指控進行調查，要彈劾就更加要三分二議員支持，預料最終通過嘅機會極微，但最少可以令到煲呔曾成為香港歷史上，首位正式面臨立法會彈劾嘅特首。