政情：勞永樂樂做住家男

西裝骨骨嘅勞醫生，日前一支公現身中上環伊利近街嘅大牌檔，叫咗碟菜遠撈麵食得津津有味。堂堂大醫生踎街邊食嘢，勞醫生話一啲都唔驚污糟，只要煮得好味就得嘞。佢又自爆係食家，記得中一嗰陣交作文功課，就揀咗教人整蛋糕，之後一有時間必定向阿媽偷師，學識煮幾味就穿梭各大街市買靚餸，返屋企做「實驗」。佢自誇好受街市師奶歡迎，攤檔老闆知佢係名人，買嘢時會自動打折頭喎。

入廚多年，勞醫生推介自家製嘅日式串燒雞翼，話味道頂呱呱。佢又拿手整燒蔬菜，同朋友去ＢＢＱ時最愛表演一番，朋友見佢燒得咁好味，指定搵佢負責燒烤。勞醫生入得廚房又出得廳堂，堪稱絕世好男人囉。