姚明失準火箭照升空

儘管姚明狀態低迷,創下個人季後賽命中率及得分新低,但慶幸其餘隊友都交到貨,尤其史高拉更頂替「小巨人」強攻內線成功,最終火箭以86比83險勝拓荒者,總成績領先二比一,兩軍明早決戰第四回合。(廣東體育周一早上9時直播)

今場姚明可謂虎頭蛇尾,首節攻入7分之後,餘下三節竟然一分都攞唔到,表現完全唔對辦!亦因為咁,「小巨人」創下個人季後賽投射命中率及得分新低,今場佢7射2中(23.9%),合共僅得7分,但就搶得13個籃板球。不過籃球唔係靠一個人嘅,火箭其餘球員都打出水準彌補姚明低迷,史高拉攻入球隊最高嘅19分9籃板,而柏堤亞亦有16分進帳,因拓荒者受作客環境影響表現一般,最終火箭有驚無險下贏86比83。

明早贏波輸盤機會高

頭號贏波功臣史高拉賽後表示:「火箭係一支整體合作嘅球隊,所以今場就算有姚明及阿堤斯表現低迷,我哋照樣可以贏波。」

拓荒者明早會再次作客休斯敦,因兩軍近兩場對賽嘅分差都唔過四分,所以明日一戰,火箭讓6分下有機會贏波輸盤。

綠軍冇加納特都「劏牛」

至於周一凌晨賽事,公牛主場再戰塞爾特人,NBA總裁史端表示,將會為收到死亡恐嚇嘅塞爾特人後衞東尼阿倫加強保安。現時「綠軍」已習慣缺少加納特嘅日子,表現愈來愈好,始終公牛一班年輕球員,經驗都不及塞爾特人,相信「綠衫軍」作客贏波機會仍高。(有線165台及體育台62周一凌晨1時直播)