本文重點
深圳進一步放寬個人遊安排，今個月起允許擁有深圳戶籍嘅居民「一簽多行」來港旅遊。旅遊發展局趁住內地五一假期前，同深圳有關當局合辦「香港盛大優惠歡迎深圳旅客」活動。香港旅遊界一向係自由黨嘅天下，除咗前主席田北俊係旅發局主席外，旅遊業議會總幹事董耀中（Joseph）亦係自由黨人。田少尋日打着旅發局旗號，名正言順拉埋身為黨友嘅董耀中、批發及零售立法會議員方剛、仲有自由黨友好旅遊業議會主席何柏霆，齊齊上深圳推銷香港。
夥自由黨友 無預謝偉俊
田少一行人尋日一早就喺皇崗口岸向準備過關嘅內地居民派發香港消費錦囊，深圳市旅遊局局長李小甘親自在場迎接，李局長見佢哋咁落力，都忍唔住出手派埋一份。佢哋派完宣傳品後，即馬不停蹄趕去深圳金光華廣場出席「香港盛大優惠歡迎深圳旅客」宣傳活動，田少仲以主人家身份向深圳居民介紹旅發局一系列推廣計劃。
自由黨一向主張派發消費券，不過佢哋呢幾個月講到口水都乾埋，而且去埋台灣做考察，但政府始終唔肯接納呢個建議。開講有話，「山不轉路轉，路不轉人轉」，身兼自由黨副主席嘅方剛見政府無動於衷，尋日就自行發功，挾住旅發局嘅號召力，以「齊抗金融海嘯大聯盟」召集人嘅身份出席宣傳活動，向幾百名深圳居民，每人送上價值二千元嘅消費券。實行以行動證明畀政府睇，消費券係Work嘅。
香港旅遊界重量級人物尋日都有出席宣傳活動，但唯獨唔見立法會旅遊界代表謝偉俊（Paul）。咁又係，去年自由黨派董耀中參選立法會選舉，諗住佢可以取代該黨元老楊孝華嘅議席，Joseph參選時仲得到上司兼老友何柏霆鼎力支持，批准佢放兩個月大假，專心準備競選工作，點知最後殺出阿Paul呢個程咬金，以九票之差奪去議席。加上阿Paul當選後，先後提出解散旅發局、重整旅遊業議會等辛辣建議，所以就算阿Paul一齊上深圳，怕且大家都會面左左，冇偈傾喇。