本文重點
立法會下周三正式表決財政預算案，雖然俗稱「五散人」嘅五名獨立功能組別議員中，已經有四人先後表態支持或傾向支持預算案，剩低「怪醫」梁家騮繼續扭扭擰擰，唔肯表態，但由於有兩名建制派議員會因事缺席投票，如果自由黨三票企硬投反對或者棄權票，再加埋二十三名泛民主派同永遠未到㩒掣嗰一刻都估佢唔到嘅怪醫同「法律超人」謝偉俊，仍然啱啱好夠票首次否決預算案，有機會引發憲制危機。
之前一直好整以暇、扮晒鎮定嘅財政司司長鬍鬚曾，喺距離表決日只有一個星期，終於開始知驚做嘢，一連兩日密會自由黨高層補鑊箍票。前日佢首先同一名自由黨核心喺酒店密會，希望對方幫手游說佢哋嗰三名立法會議員支持預算案。
補鑊開空頭支票
有自由黨核心成員就指出，該黨提出嘅多項預算案建議，包括派發消費券、暫緩預繳稅以及提高中小企貸款計劃嘅政府擔保比率等，政府一項都冇接納，到依家先嚟臨急抱佛腳，叫佢點樣幫手？據聞鬍鬚曾回應話，其實政府都認真研究緊該黨嘅其中一項建議，一旦諗掂就會喺六月份推出，希望該黨可以回心轉意，至於嗰項到底係乜嘢建議，就仲未開古住。
鬍鬚曾向自由黨核心落完藥，尋日再喺香港會同該黨主席劉健儀同副主席方剛撐枱腳，據聞席間都有談及預算案問題，但究竟用乜嘢嚟換取自由黨嘅支持，大家不妨等着看。
自由黨下周二即預算案表決前一日召開黨團擴大會議，集思廣益決定到底應該投乜票。有該黨高層指出，雖然鬍鬚曾開出嘅只係一張冇銀碼同冇兌現日期嘅空頭期票，但該黨好可能最後要被迫支持，原因當然唔係畀面鬍鬚曾同煲呔曾，而係為咗顧全大局，唔想香港喺呢個關鍵時刻，因為否決預算案而引發憲制危機，令政府以至整個社會都唔能夠集中精神應對金融海嘯。不過即使預算案最後勉強通過到，都肯定係史上最低票，鬍鬚曾照樣係顏面掃地。