本文重點
ＮＢＡ常規賽煞科日，三支爭名次爭崩頭嘅西岸球隊馬刺、拓荒者及火箭命途各異，馬刺及拓荒者順利贏波，可憐火箭作客慘負小牛八十四比九十五，失落西南組冠軍之餘，更因此跌到第五，連季後賽首圈主場優勢都冇埋。
季尾一直鎮守西岸三哥位置嘅火箭，估唔到最後關頭失守，尋日作客小牛又犯末節腳軟毛病，畀小牛強勢逆轉，最終火箭以十一分落敗。因同日馬刺加時以一○五比九十八險勝黃蜂，最終馬刺壓倒火箭成為西南組冠軍，將以第三種子出戰西岸季後賽，對手將會遇上升上第六嘅小牛。
小牛首圈喜遇馬刺
「小巨人」姚明今場整體數據不俗，廿三分九板，可惜佢下半場大跌Watt，第三節僅得四分而末節更捧蛋，再一次顯示體力不繼嘅弱點。
相反小牛方面，「孖寶」喺常規賽尾愈戰愈勇，魯域斯基個人攻入三十分十五板，而老將傑特則再一次貢獻「三雙」十一分十二助攻十板，造出職業生涯第一○三次「三雙」，以小牛嘅走勢，首圈踢走缺少真路比利嘅馬刺絕不出奇。至於拓荒者，煞科日大勝金塊一○四比七十六，將以第四種子身份迎戰火箭。
東岸方面變動不大，騎士讓勒邦占士及伊高斯卡斯休息下，加時以一一○比一一一不敵76人，今季主場第二次輸波，亦因為咁錯失追平ＮＢＡ最佳主場成績。贏波嘅76人升上第六，將與魔術對決，而公牛就要喺首圈應付塞爾特人。