智經研究中心唔經唔覺搞咗三年，主席胡定旭亦愈做愈開心，皆因智經呢幾年提出嘅方案，好似落馬洲河套發展、深圳居民來港「一簽多行」同最近深圳地鐵話要考慮讓八達通「一卡兩地」通行等，都被政府等有關方面接納甚至落實，唔怪得肥胡好得戚咁話：「當初好多建議提出嚟都畀人話我天馬行空，依家證明係可行㗎！」
肥胡覺得做智經主席最緊要係識得天馬行空出主意，而佢就慣咗邊聽音樂，邊做運動邊沉思。好似早兩日智經公布教育合作研究報告前一晚，佢就一路玩跑步機一路度橋，結果跑到凌晨兩點都不自覺，肥胡講笑話：「我仲因為咁而Miss（錯過）咗陀槍師姐呀！」原來佢每晚深夜返屋企，例牌玩跑步機兼煲埋電視粥，最近無綫深夜重播關詠荷主演《陀槍師姐》，肥胡幾乎日日都追。
肥胡何時何地都顧住諗計，會唔會搞到精神緊張㗎？肥胡就話，平日睇電視可以減壓，有次睇到退休練馬師簡炳墀上電視解釋「牙擦」、「招積」同「沙塵」嘅分別，仲笑到佢碌地，所以佢話睇得多呢類電視節目，除咗可以放鬆心情之餘，仲可以訓練思考喎！