當你每朝眼矇矇起床，用過「活視康」，眼睛不再乾澀，一天光明幸福由此開始！一用十五年，之後才發現：呢隻嘢原來未經註冊，好彩滴咗咁多年都冇事。你於是疑惑：衞生署要來做乜？咦！它是管理我們的衞生間、洗手間的清潔衞生？今後水廁塞咗，通渠佬都唔使搵，打去衞生署啦！否則老朽想不出它有何存在的價值及意義。政府「六大優勢產業」全面強有力的介入並展開，求才若渴，唐唐已身兼管樹大隊長，衞生間署長，不！衞生署署長不妨兼任「洗手間大隊長」。
從未註冊的「活視康」賣足十五年都冇事，人人依然睇到幻彩詠香江，依然睇到未來黃金十年，毋須解謎問風水師：你話香港唔係福地係乜地吖？我們唔戀香港一生一世又戀乜呢？衞生署又話四年前已促「活視康」註冊，藥廠又話唔知。大佬啊！四年，我個孫都大學畢業忙於搵份四千蚊嘅工，你哋仲未曾跟進隻眼藥水註冊未？香港呢個「動感之都」畀你班poor guy害鬼死，已變「癱瘓之城」！
有經濟學家說，訊息不對稱不見得完全是壞事。如果政府的甚麼訊息公眾全知道，連國防機密也成了公開訊息，豈不妨害國家安全？就民間生活而言，如果夫妻雙方訊息全對稱，各自連一點隱私都沒有，生活能幸福嗎？糊裏糊塗的愛，那就是雙方訊息不對稱情況下的愛，真的清醒了，甚麼都明白了，愛就沒了，這正是婚姻成為愛情墳墓的原因。結婚了，雙方神秘的私人訊息公開了，愛就不存在了。
對於這個凡事吹水的政府，訊息不對稱是好事，知多啲，驚多啲，心臟病都易發啲！所以訊息不對稱未必不是福！當沒有了「一日一東方，心亮似陽光」，政府可以誇啦啦的大叫：創意產業頂呱呱！混吉都種豆得瓜！香港是福地，問題藥物賣通街，食你唔死最多瞓街（此抗議的一種形式，不是粗口）。