駭人事故爆不停 醫者何來父母心

唔少人都知「杏林」係醫學界嘅代名詞,不過對於香港公立醫院嚟講,呢種講法要改嘞,事關公院醫療事故長爆長有,已經去到駭人聽聞嘅地步,既有醫生左右不分,又有醫生前後調亂,叫呢班錯漏百出嘅醫生做「呆林」就差唔多。

話口未完,公院又添兩單醫生發呆事故喇。話說有位港媽喺廣華醫院自然分娩,點知醫生漏咗幫佢陰部縫針,搞到佢下體流膿,肉眼仲睇到上陰唇甩咗手指咁大忽肉出嚟,聽到都得人驚。最難以置信嘅係,陰部嚴重撕裂,廣華居然話「等佢自己好」,開啲止痛藥就算,問你服未。雖然院方最後都肯做手術,但港媽手術後連行路同坐低都痛,生活大受影響,見過鬼怕黑,唔敢生第二胎咁話。

嗱,沒有最恐怖,只有更恐怖,今次輪到伊利沙伯醫院喇。有八十歲老婦喺該院做大腸造影檢查,點知放射師竟然將肛門導管插入陰道,造成兩處傷口,最後需切除輸卵管兼捱十八針。臨老先整鑊咁甘嘅嘢,唔死一身潺,你話班醫護人員係咪冇心冇肺吖?

真係諗極唔明,生BB又唔係咩奇難雜症,複雜程度有限,醫生咁都可以漏咗縫針,做嘢有幾求其可想而知。至於放射師肛門陰道不分,直情連基本常識都冇,更係匪夷所思。

冇錯,前線醫護人手長期不足,七個蓋冚十個煲,工作量大係事實,但都唔應該抱住草草了事嘅心態開工。好似老婦單嘢咁,顯影劑若果經陰道流入腹腔同血管,隨時死人都有之,院方拖延幾粒鐘先至救人,仲要冇即時認錯,有冇再離譜啲呀。難怪有人話前線醫護人員似閻王使者多過白衣天使,病人一隻腳踏入公院,另一隻腳踏入鬼門關,真係冇誇張o架。

數字不會說謊,單係今年首季,公院已爆出七宗醫療風險警示同廿宗重要風險事件,有孕婦剖腹產子,下腹遺留麻醉針針頭;有腫瘤病人延遲四年至接受治療,簡直無奇不有。當局每次都話成立小組調查,每次都無人需要問責,結果係永遠冇人吸取教訓。講到尾,咪就係醫醫相護嘅惡果囉,醫生出錯唔使受罰,甚至有名醫開刀途中丟低病人走去私院搵真銀,話就話不獲大學續約,其實轉個頭又可以去大學旗下嘅內地醫院繼續搵錢,賞罰不分咯喎,醫療水平每況愈下有乜出奇。

睇到喇,今時今日醫者唔止失去父母心,直頭話係草菅人命都不為過,港府唔加強監管不特止,仲要千方百計推卸公營醫療責任。所以話啫,喺香港地做窮人,唔怕死、最怕病就係咁解。