本文重點
滙控供股反應理想，管理層都算還得神落，滙豐亞太區主席鄭海泉前日忙裏偷閒，同太太拖手去金鐘太古廣場Shopping，鄭大班透露上周曾到訪四川災區視察，慨嘆災區經歷風雨後，小朋友仍然只靠執石仔當玩具，睇見都心酸。
送泥膠氹小朋友
鄭大班話，復活節假期唔打算外遊，皆因呢排搭得太多飛機，過去一星期先後飛倫敦及上海傾生意，又去四川成都及綿陽考察，行程密到插針都插唔落，簡直鐵人一樣。
大班去外國公幹好正常，何解咁有心去四川考察？原來滙豐有個慈善基金，早前曾撥款喺四川災區興建幼兒院及醫院。大班話，經歷浩劫嘅災民生活依然貧困，細路仔連玩具都唔多件，平日悶極只係執幾粒石仔玩，於是佢買咗大堆泥膠當禮物，氹到班小朋友笑
。之後又去咗醫院探望曾截肢嘅小童，睇住佢哋裝上義肢後重新學行嘅情景，內心好感觸喎。
講番滙豐未來前景，鄭大班話滙控股價早前大插水令股民損失慘重，真係要同大家講聲唔好意思，佢拍心口話，嚟緊會盡力將間銀行做好啲喎。
卓妮