DOCOMO L-04A影Funny face扮兔女郎

女仔揀手機，大多先睇外表，啱啱返新色嘅DOCOMO L-04A，修長全黃搶眼機身，第一眼已經吸引住大家視線。而3吋觸控屏幕再加實體鍵盤，用落夠方便，最重要係510萬像素自動對焦鏡頭配合Funny face功能，變貓狗變兔仔玩埋Fisheye打格，完全為鍾意玩影相特效嘅女士們而設，即刻擺個Kawaii表情啦！

售價：$3,380（設計圖片）

篤芒加鍵盤

依家好多手機都用篤芒，似乎已經成為大趨勢，但係數字鍵盤無論打短訊同電話都方便好多，所以部分日系手機會兩者並存，L-04A就係其中一部。手機功能絕大部分都可以透過3吋觸屏控制，雖然採用電阻式屏幕唔似iPhone可以Multi-touch，但反應尚算敏捷。如果你嫌篤芒唔就手，可以用番實體鍵盤，有埋MENU、十字方向鍵等，方便不同習慣的用家。

滑開後機身頗長，不過女仔拎上手唔算太大部。

採用日系手機指定充電器，連保護蓋都用埋黃色！

內置5款體感遊戲M-Toy，擲飛鏢就係其中一隻，啱晒鍾意玩遊戲嘅朋友。

功能細心周到

講到內涵，L-04A雖然唔係智能手機，但功能一啲都唔馬虎，除咗一般多媒體功能，仲有Document Viewer方便你睇Office文件同PDF檔案，不過就唔支援Office 2007或以後版本。另外，仲有其他好用軟件包括Sketch Memo畀你邊畫邊記事；而日英、英日字典就等你有日文字唔識可以即查！值得一提，L-04A已成功軟解，毋須使用Hyper SIM，入卡即用！

12格功能表清晰易用，而且介面風格可以畀用家自由轉換。

Funny face介面備有多種特效選擇。

扮河馬老虎

大部分日系手機都Sell勁鏡頭高像素，L-04A雖然只得510萬像素Schneider鏡頭，但勝在功能搭夠。尤其Funny face效果，大頭、打格、落雪、魚眼效果任你揀，鍾意可愛嘅可以玩埋Animal Mask扮河馬、老虎等動物，啱晒Kawaii嘅女仔！不過要留意，Funny face功能最大只支援480×800像素的相片，而且要對準人面先用到，略嫌唔方便。