對上一集《Splinter Cell: Double Agent》已經係06年出品，籌備3年有多，呢隻王牌軍事特務遊戲先至推出第5代《Splinter Cell: Conviction》。仍然係「悲情特工」Sam Fisher擔大旗做主角，今次愛女被殺，而且連組織都唔理佢，冇強大支援下一條友深入虎穴查明真相。好在遊戲加入兩項新動作系統，潛入殺人容易咗，以卵擊石都未必冇得打！
之前已經話主角好悲慘，被摯友出賣、被國家及組織離棄都算，今次連佢個女Sarah都被車撞死，但係身邊所有人好似冇事發生過一樣，連肇事司機都可以逍遙法外，激到Sam Fisher離開組織，以一己之力去調查事實真相。《Splinter Cell: Conviction》玩法仍然係傳統嘅潛入突擊模式，由最初地中海島國馬耳他打到去美國首都華盛頓特區，今集更可以任意利用各種建築物及光源變化的特性來行動，如果唔小心畀其他人發現時，就要快手匿入暗處，當畫面變成黑白就代表走佬成功。
為咗令玩家易於完成任務，今集加入兩項新動作系統「Last Known Position」同「Mark & Execute」。前者意思係玩家匿入黑暗前最後現身嘅地方，敵人會起勢圍攻呢個留低嘅殘影，Sam Fisher只要把握時間兜到殘影嘅背面，就可從後反擊敵人。至於「Mark & Execute」就係先預設攻擊敵人嘅先後次序，揀好後啟動系統就可以發起一連串攻擊；睇落好易用，但使用呢招其實都有限制，每次行動時手槍只可消滅兩個敵人，而霰彈槍就可提升到3個，而且缺點係槍聲太大會惹來更多敵人。
《Splinter Cell: Conviction》多人連線模式特別在Sam Fisher可以抖一抖，交由美國特工Archer同俄國特工Kestrel上場表演。合作模式入面要兩個玩家通力合作，搵番4枚俄羅斯製EMP彈頭；而多人模式Deniable Ops Missions就有4種唔同玩法同6個地圖畀大家，雖然多人模式最多只得4個人玩，但以《Splinter Cell》系列嚟講已算係突破。遊戲設有普通版同特別版兩款，特別版標價$499，送齊手辦模型、鎖匙扣電筒同服飾、武器下載卡，合理過《北斗無双》。
類型：動作冒險
開發：Ubisoft
平台：Xbox 360
推出日期：4月13日
售價：$359（普通版）$499（特別版）
查詢電話：2481 6693
撰文：布偉倫