我常常說香港是一個好奇怪的地方，因為人人都覺得錢好重要太重要，所以有好多因為錢而產生的怪現象……
如果你是上班一族，你一定感受過地鐵站口收報紙黨的煩厭，未出到地鐵站，你已經見到一大班公公婆婆人頭湧湧在地鐵站口列隊，攤大手板問你攞手上份免費報紙！咩事呀？
最嬲的是公公婆婆覺得你一定要畀佢咁，未睇完都要畀？有公公婆婆仲過分到叫你喺閘入面拎一大疊畀佢……會唔會真係太過分呢？
其實公公婆婆除咗喺地鐵站口問人攞報紙之外，仲會去各大文娛中心表演場地攞人哋舞台騷的宣傳單張！有舞台界的朋友同我講，佢哋每次出騷印宣傳單張都要預埋畀公公婆婆攞走條數，你哋知唔知幾多？起碼要印多幾萬張！
其實我真係唔明白，點解老人家要咁樣對自己？我相信政府對你們應該有足夠的照顧，如果你唔係日日要食鮑參翅肚，要住豪宅有人服侍的話，在香港，安享晚年，應該不太困難，比上不足比下有餘。
最後，我想同收報紙黨講，你哋都勞碌咗幾十年啦，唔通真係要自己勞碌到死嗰日咩？唉……可以的話，對自己好一點。
時裝設計師