CX3影低你個貓樣

唔少人屋企都會養寵物，閒時陪貓仔玩繩球、帶狗仔落街散吓步，不過想捕捉寵物最自然一刻絕不容易，一來怕閃燈閃親貓貓對眼，二來對焦快門聲又會嚇醒佢哋。因此Ricoh全新CX3輕便型相機在28~300mm長炮內加入PetPet寵物拍攝功能，自動追蹤貓狗面孔和動態，仲可以拍埋720p高清短片，隨時記錄動人影像。

售價：$2,980

28~300mm新CMOS長炮

行內人話「BB與狗，難影到嘔」，連專業攝影師見到寵物都感到頭痛，更何況拎住DC仔的用家呢？為了唔想嚇親寵物，CX3除了配備300mm長鏡離遠Zoom埋去，感光元件亦換上最新背光CMOS，雖然只得1,000萬像素唔多夠喉，但配合GR Digital Ⅲ的降訊噪功能，在室內昏暗環境唔開閃燈都能拍出清晰影像。調校最高解像度可以每秒5張高速連拍，貓仔跳來跳去都唔使怕。

換上背光CMOS後唔開閃燈都能拍出細膩影像，睇吓貓貓幾鍾意部CX3。

CX3沿用GR Digital的十字操控盤，調校拍攝設定或睇相就更方便。

在場景模式內可發現新增的PetPet模式，識得自動關閉閃燈和聲音。

PetPet模式靜雞雞

在拍攝模式方面，其實上代已有SCENE場景和DR高動態範圍拍攝功能，今次為了拍攝心愛寵物，特別追加PetPet選項，啟動後相機便會自動調至高靈敏度低訊噪，並關掉閃燈和聲音，追蹤貓狗面孔進行對焦，偷拍得意靚相肯定神不知鬼不覺。同時亦新增SCENE-Auto模式，根據現場環境自動切換至人像、夜景、風景和微距等，即係好似其他機仔的自動場景模式，令拍攝更加簡便。