今年情人節，商舖唔係休巿就搞情人活動，明明每年都話單身人士數目遞增，點解情人節要兩個人先過得開心？其實一支公都可以搵到好節目，男的影相睇騷脫離毒男行列，女的玩「友緣人」整蛋糕唔再做宅女，新年出街行個大運，隨時遇到生命中的另一半。
撰文、攝影：鍾鎮科、陳若冰 模特兒：Eva、Perry（Kaleiscope）
查詢電話：（a）2341 2356、（b）2805 0566、（b）2368 9389
一支公 好節目
新春情人節得番一支公，冇手拖頓時覺得春仍是冷，好彩網上討論區仲有大把人陪我Say hi，不過我又唔係毒男，只是鍾意打機影相，冇理由情人節呆在電腦前Hi足十幾版，上「友緣人」覆完訊息，一於出街搵好節目。
早上：打機醒醒神
每逢新年例必同班朋友玩Party Game，今年個個冇義氣走晒去陪女。嘿，我一個人都有Game玩，Xbox 360情人節期間在尖沙咀海港城擺設遊戲試玩館，有大批Live Arcade如經典的《太空侵略者》等免費任玩，只不過在場見到人哋出雙入對印製Avatar情人卡、玩拼圖合照。怕眼冤就在屋企單撈來玩，搵到PS3隻《Fat Princess》索性養肥隻公主，睇吓仲識唔識發公主病。
下午：紅外線攝廟宇
新年點都要行個大運，見人哋爭住上頭炷香求籤，自己一支公唔使煩，不如順道去廟宇名勝影相輕鬆一下，好似志蓮淨苑、寶蓮寺等年初一照常開放，影吓遊人風景、玩特效靚相都幾過癮。咦？對面個女孩行過來又幾襯靚景，等我用紅外線相機影低佢先。
晚上：睇Show
一支公有時都有好處，平時買飛睇戲聽演唱會，總有單丁靚位買得到，咁啱情人節有巡迴劇《舞動寶萊塢》最後一日在港演出，不失為消閒好去處。睇完Show，竟然收到個女仔電話？
舞動寶萊塢
巡迴劇《舞動寶萊塢》（The Merchants of Bollywood）來到香港，超過40位來自世界各地的演員，集跳舞、音樂和故事演出於一身。
地點：香港演藝學院歌劇院
時間：2:30pm或7:00pm
票價：$395~$795
購票熱線：3128 8288
唔做宅女 主動出擊
自從跟前度男友分開後，已差不多兩年時間沒拍拖了，情人節孤伶伶度過當然不是味兒，所以今年決定要積極一點，為下一次戀愛鋪路，好好握緊自己的幸福。
早上：網上開闢社交圈
大清早跟家人拜過早年後，便上網跟人聊天，之前看過一本海外雜誌，介紹Skyecandy的Video Speed Dating平台，覺得幾好玩，也因此而認識了一些來自海外的朋友，甚至還進行了視像約會呢！雖然談得也很投契，不過「遠水不能救近火」，即管試試朋友介紹的本地交友網吧！
在「Yahoo!友緣人」上，有列出對方的相片、興趣、性格等資料。咦？這個男的平日鍾意影相，我也很喜歡被人影喎，而且他和我一樣喜歡吃甜品，樣子可惜沒有公開……冇所謂啦，不如試試和他交談吧！
Skyecandy網址：http://www.skyecandy.com/
Yahoo!友緣人網址：http://hk.personals.yahoo.com/
友緣人收費：一個月會員$120、3個月會員優惠價$240（參加者年齡需為18歲或以上）
下午：上炷香求姻緣
拜神最講求誠心，朋友話大年初一去黃大仙上頭炷香最靈驗，即管去一去，祈求吓姻緣運都好。係喎！他說過中午會去志蓮淨苑影相，橫豎在附近，不如去撞吓佢，睇吓大家有冇緣啦！
晚上：整蛋糕
前任男友曾經嫌棄我不懂煮嘢食，於是的起心肝去學。今日情人節，師傅話全日都忙住教整蛋糕，好多女仔都即學即整，諗住晚上送畀男朋友。反正自己都鍾意食甜品，所以我都唔執輸一早報咗名！
終於完成啦！個賣相唔錯呢！不過我一個人又似乎食唔晒喎，不如……打畀「友緣人」個男仔，睇吓佢有冇興趣試吓我嘅手勢先！
優廚坊飽餅教室
整個過程由磅材料到完成後的裝飾，都由學員一手包辦，讓學員對每個步驟印象更深刻，即使離開課室亦能自行重做出來。
會員價：$200、非會員：$220（c）（每堂一個6吋蛋糕）