好多內地廠家成日都話請唔到工人。查實內地企業真係乜level嘅員工都唔夠，呢個憂慮仲係有數據支持o架！
根據羅兵咸永道會計師事務所做嘅全球CEO年度調查，高達54%嘅中國CEO認為人力因素，成為制約企業有效創新嘅掣肘，比例遠遠高於全球31%嘅平均水平。
受訪者嘅對象好闊，人數多達來自60個國家和地區嘅1,258名CEO，中國內地及香港地區有160位，包括聯想集團董事長兼CEO楊元慶、青島啤酒總裁孫明波、玖龍紙業董事長張茵等，所以調查結果好有代表性。
59%嘅中國CEO認為招聘工人變得愈嚟愈難，呢個挑戰出現喺所有部門，最嚴重短缺嘅係中高層經理。
佢哋嘅中國上海主管合夥人顧宜，認為中國企業缺乏人才、特別係國際高端人才並非係薪酬過低，原因好複雜，本地法規、稅收政策、文化環境，以及學校、居所、交通等軟硬件設施，尤其是「實現自身夢想的氛圍」，都可能影響國際人才向中國流動。
個調查都有啲「正面」數據：超過五成嘅中國CEO對其公司喺新一年發展「非常有信心」，主要來自內地消費市場嘅支持。不過，舊年嘅數字係72%。