被市場戲稱為「壞孩子」嘅對沖基金好孩子基金（TCI）又有新搞作，好彩今次畀佢搞嘅公司唔喺香港而喺印度，中招嘅公司叫做Coal India，以產量計係全球最大嘅煤礦商。TCI今次就話Coal India違反咗信託責任，仲要脅話隨時會同佢對簿公堂。
以前我哋都見識過TCI嘅手段，入股某公司成為少數大股東後，就對公司進行鐵腕整治。早年佢入股領匯（00823）同新世界（00017），就傳出呢兩間公司會被拆骨或者追擊嘅疑雲。
TCI創辦人兼行政總裁霍恩（Chris Hohn）今次就話Coal India損害佢哋嘅利益，指Coal India將三分之二嘅出產以市價三折賣畀能源企業；又話Coal India喺政府嘅壓力下低頭，以致未能夠履行產出目標。
過往TCI打呢啲硬仗都有輝煌嘅戰績，好似舊年佢哋叫Japan Tobacco增加派息同埋回購股份，就令到呢間公司嘅股價喺六月時升一半。霍恩就話今次同Coal India係長期鬥爭，隨時準備好出庭作證。不過今次市場都唔係咁睇好TCI嘅勝算，因為呢間公司嘅大股東係印度政府，持股量達九成。