獎勵員工、激發僱員幫公司賺錢，一定唔可以孤寒。咁點至算係出手闊綽？送iPhone同iPad梗唔得，睇珠海威絲曼服飾公司一口氣送十一部富豪XC60、寶馬X1同平治C180等名車畀伙記，就真係「豪」嘞。
雖然港人對呢間早年喺珠海成立嘅品牌服裝公司唔多熟悉，但呢間公司喺當地好有名氣。公司啱啱舉行咗「2011年度業績精英贈車儀式暨優秀員工表彰大會」，向11名管理精英同技術人員每人獎勵名車一部。聽講攞到靚車做獎勵嘅員工，最後生嗰個只係三十出頭咋。
威絲曼由○五年開始推出重賞員工嘅政策，七年嚟花咗二千萬人仔獎勵員工，淨係過去三年贈送嘅名車就值成千萬。好似對優秀員工，公司仲提供免息貸款畀佢哋安居置業。咁大手筆同啲員工分享成果，無非都係想留住珍貴嘅人才，條橋梗掂喇！
余詩韻