絲絲講場：舜宇王文鑒唔搞父傳子
子承父業向來係中國嘅傳統，所以唔少上市公司老細都年紀輕輕。不過，絲絲尋日同舜宇光學（02382）創辦人王文鑒傾偈時，佢就話畀絲絲知自己好反對家族化經營，仲講咗一大堆又散又聚嘅道理，決定唔交棒畀個仔。
退下火線去歎世界
王總話五年前已經考慮交棒，依家正式放手，留任名譽主席算。佢話現時管理層經驗十足，有信心即使自己退咗落嚟，對公司完全冇影響。王總仲話，同太太結咗婚幾十年，自己都忙住做嘢，所以依家就打算帶太太周圍去行吓，開始歎吓世界咁話。不過佢補充，自己都會留意住公司嘅發展。
至於新主席葉遼寧，其實都係公司創辦人之一。葉總話王總係自己個老師，喺佢身上學到好多嘢，期望可以將公司再「做大做強」。
舊年隨智能手機潮流發展，舜宇業務增長得好理想，所以公司都有同中高管理層分享成果，分別於農曆新年前評審花紅額，同埋喺嚟緊四月份又會分派購股權。喺科技企業中，用咁樣方法去留住人才，公司先會加快成長。