絲絲講場：孫明哲「樓上」返新工
絲絲喺報料前想問吓大家，試過轉工後依然喺同一幢大廈返工未？德銀前亞洲區X-markets主管孫明哲（Gary）喺幾個月前離開德銀，佢尋日正式過檔高盛做董事總經理，負責亞洲私人投資產品經銷業務，咁啱得咁蹺，高盛及德銀嘅辦公室同樣位於中環長江集團中心，所以Gary返工撳升降機，只需由48樓改為68樓就得。
主責窩輪兼顧私投
Gary喺德銀任職超過6年，最初負責窩輪銷售，其後涉獵埋結構性產品及交易所買賣基金等產品，可謂「百足咁多爪」，所以佢今次加盟高盛，同樣唔單只主責窩輪生意，仲要兼顧基金及私人投資產品經銷業務，為投資者度身訂造投資產品。
提起高盛窩輪，唔少人會即時諗起第一代「輪后」、高盛前執行董事李頌慈，但目前未有佢嘅最新去向，亦冇復出嘅消息。依家負責接觸傳媒及散戶嘅係高盛衍生產品部執行董事司徒光耀，證券衍生產品主管郭強就繼續留守幕後，主理交易員工作。
余絲韻