大家知唔知「小財唔出，大財唔入」嘅相反係乜呢？答案係「偷雞唔到蝕揸米。」話說市場失當行為審裁處尋日就一單內幕交易定下罰則，犯案者要負責180萬元嘅調查費用，都幾「乸脷」。
審裁處就住已經被百麗（01880）私有化嘅美麗寶，喺兩年前一宗內幕交易案向財政司司長呈交報告，報告指美麗寶一名關連人士劉燕艷喺百麗正式提出私有化美麗寶前，向一名叫張必佳嘅人披露咗呢單內幕消息，呢位張先生就把持唔住，掃入美麗寶等收錢，點知事件東窗事發，兩人被裁定從事內幕交易及違反證券條例，審裁處要兩人負責相關嘅律師費以及證監會嘅相關開支，當然仲要交出從事內幕交易而賺取嘅盈利兼利息。
絲絲睇到都忍唔住笑咗，皆因張先生只賺咗7萬幾蚊，但兩人淨係負擔政府及證監會嘅調查費用就共達180萬元。條數係咁計嘅，兩人分別承擔政府嘅訟費及開支為102萬元及53萬元，證監會訟費及開支為13萬元及10萬元。
從另一個角度睇，政府嘅調查費真係幾貴，莫非係調查過程好複雜？
余絲韻