絲絲識得唔少「賓卡」都鍾意品紅，渣打香港中小企業理財香港及華南總監區偉權（Kelvin）同絲絲講，話佢都好鍾意飲紅酒，去年仲特登去咗法國波爾多嘅四大酒莊「朝聖」，依家就好喜歡發掘啲新地區出品嘅靚紅酒，即係佢哋所謂嘅「新世界酒」。
Kelvin話以前見客都要傾吓紅酒經，學學吓發覺飲紅酒減壓一流，去年去埋法國波爾多四大酒莊朝聖及留影，講起當時與太座喺葡萄園黃昏漫步，真係浪漫到極。
不過Kelvin話，佢並唔係法國酒嘅「死硬派」，呢排仲好鍾意飲「新世界酒」，佢話如果搵到好嘢，勁有成功感，依家周末與太座開支酒煎件扒歎吓，感覺已經好正。
其實Kelvin一向都好鍾意周遊列國，佢讀大學一年級時，已經喺芬蘭首都赫爾辛基做咗兩個月暑期工，乘機周圍去，曾經去過有歐洲第一高峰之稱、位於瑞士嘅少女峰，又去過北極地帶，仲話有機會第日想去埋南極玩一轉！
畢業後Kelvin入咗銀行做，目標仲想坐中環向海大房添，點知原來做波士係冇房嘅，因為啲靚嘢畀晒啲客，佢即刻明晒乜嘢叫以客為上，個客開心緊要過波士開心喎。
余絲韻