絲絲講場：彤叔三爺孫見證新旗艦
新世界（00017）主席鄭裕彤經常中港兩邊走，最近又去咗北京一趟，皆因彤叔旗下嘅周大福喺北京開設佢哋全球最大嘅旗艦店，亦係佢哋第1,000間分店，所以彤叔三爺孫都有出席開幕禮。
彤叔話，周大福已有80幾年歷史，一直秉承「真誠、永恒」呢個理念運作。除咗彤叔之外，佢嘅兩位乖孫，亦係周大福董事嘅鄭志剛及鄭志恒都有到場，當然唔少得董事總經理黃紹基以及一眾中港兩地嘅公司管理層，佢哋嘅目標係於二○二○年開設2,000間分店。
周大福旗艦店北京開幕
講番呢間旗艦店，坐落喺有「天下第一街」外號嘅北京崇文區前門大街，由兩幢各4層高嘅珠寶及鐘錶旗艦店所組成，總面積逾28,000方呎，係周大福目前喺亞太區面積最大、產品最齊全嘅店舖。據講呢條街已有570年歷史，乃明、清兩朝皇帝出巡祭天嘅御道，亦係古都中軸線上最具京味及最繁華嘅商業街區以及歷史文化區域。
絲絲睇見開幕儀式好配合新店嘅環境，即係糅合古典與時尚氣息，又凝聚東西方文化精髓，例如有氣勢磅礡嘅擊缶表演以及小提琴演奏等。
余絲韻