新老闆Ace拓壽險
老友同絲絲講，尋日管理層已經與所有保險代理會面，分析吓收購詳情兼未來優勢，以安定軍心。老友仲話，一直有傳紐約人壽想撤出香港業務，大家應該早有心理準備，所以換老闆對佢哋影響唔大，員工最關心係新老闆有冇決心打響品牌，等佢哋繼續落力Sell客。
咁呢層又唔使擔心，Ace集團來頭唔細，雖然只有25年歷史，但已經喺52個國家有業務，近年積極擴展亞洲業務，之前仲入股內地嘅華泰保險。不過來頭咁猛，老友又驚唔驚飯碗不保？老友就話完全唔驚，因為Ace集團一向做開產險，今次收購反映佢哋想發展壽險市場，家陣可謂用人之際，相信大家只會相得益彰。
余絲韻