絲絲講場：陸東領養兩犬顯愛心
測市好準嘅「星級分析員」陸東（Andrew）性格向來我行我素，其實佢份人好和藹可親㗎，對動物仲好有愛心。早兩日絲絲同佢食晏時傾開「狗仔經」，先知道佢兩隻愛犬「Sausage」及「金仔」嘅故事，當中情節非常感人，令絲絲有感而發：「各位主人真係要永遠愛錫你哋嘅寵物呀。」
諗番起與Sausage嘅緣分，Andrew感慨地話：「○七年我睇報紙新聞，知道Sausage曾經兩次被主人遺棄，最後一次更被人用鐵鏈鎖住條頸，搞到傷痕纍纍，後來鄰居聽到慘叫聲於是報警，由警察及漁護署人員將佢救出。」至於金仔嘅命運亦令絲絲覺得好嬲，因為其男主人性格迷信，以為養狗會影響女主人肚中Baby嘅成長，於是就唔要金仔。
重獲新生超級幸福
自從Andrew喺愛護動物協會領養咗Sausage及金仔後，依家兩隻狗仔真係超級幸福，因為Andrew放假就會留喺屋企陪佢哋玩。「平時我好鍾意抱住Sausage睇電視，有時又會帶金仔去跑步，平時都會用手機幫佢哋影吓相。原來Andrew唔單只係「星級分析員」，仲係「星級動物主人」添！
余絲韻