絲絲講場：MasterCard 孫奕朗登場
絲絲日前先講過，MasterCard大中華區任命咗新管理層，由之前喺澳洲西太平洋銀行任職嘅孫奕朗（Jeroen）出任香港及澳門區總經理，佢尋日就出席「大新國際學生證/教師證萬事達卡」嘅發卡儀式，嚟自荷蘭嘅Jeroen為人好友善，而且仲好勤力，雖然抵港只有三個星期，但就馬不停蹄咁工作，都未有時間到處觀光。
Jeroen透露，佢太太及兩名分別2歲及4歲嘅囡囡都一齊嚟咗香港，有屋企人陪伴左右，難怪即使要適應新嘅工作環境，佢依然笑容滿面啦！
尋日與Jeroen同場嘅，仲有大新銀行（02356）執行董事藍章華（John），講番「大新國際學生證/教師證萬事達卡」呢兩張新卡，目標對象係本港7萬名國際學生證及1.5萬名國際教師證會員。
藍章華碌卡識慳錢
今年大新已先後推出咗好幾款題材新穎嘅信用卡，好似SANRIO及IQ博士信用卡，絲絲打趣問阿John有冇申請番一張IQ博士信用卡時，佢就笑稱自己係成年人，所以最常用嘅係大新Autotoll信用卡，貪呢張卡簽帳消費滿3,500蚊可獲豁免該月快易通行政費喎！
余絲韻