港交所（00388）主席夏佳理會喺下月十日至十二日去法國出席國際交易所聯會（WFE）年會會議，今次年會意義重大，除咗係WFE嘅50周年外，仲會選出WFE新主席，作為香港代表嘅夏佳理係大熱人選。夏佳理仲計劃順道去意大利推介香港，見吓當地企業，斷估佢都會趁機游說女士鍾情嘅Prada來港上市！
港交所近年積極開拓海外公司來港上市，趁今次法國之行，夏佳理正計劃行程，打算順道去埋意大利會見當地企業，推介佢哋嚟香港上市。早前已盛傳Prada有意來港上市，如果今次夏佳理去意大利，估計佢定會游說Prada嚟香港掛牌喇！
事實上，市場人士及投行對Prada在港上市非常有興趣，仲話夠晒賣點，肯定受歡迎喎！咁又係嘅，身為女士嘅絲絲屆時都一定捧場啦。之不過，意大利出名嘅又豈止Prada，男士們就話法拉利都係意大利出品喎！唔知法拉利又有冇興趣加入港股呢個大家庭呢？
講番WFE，夏佳理依家係副主席，按傳統慣例，由副主席升任主席嘅機會好大，不過一日未正式選出，大家仍要拭目以待 。若夏佳理當選WFE新主席，肯定為港爭光，新主席任期由明年一月一日起生效，為期兩年，即係做到二○一二年底；喺二○一二年四月，夏佳理亦會卸任港交所主席。
余絲韻