絲絲講場:上商總行重建玩「跳層」

上海商業銀行喺金融海嘯前買埋中環總行隔籬嗰幢大樓,依家嘅總部明年就開始拆,新大樓將由名設計師嚴迅奇設計,會喺5年後落成,樓高28層。上商董事長榮智權(Lincoln)好風趣咁話「唔少得『跳吓層』啦」,因為14樓及24樓都唔會有。絲絲諗落咁都啱嘅,始終中國人地方,做生意最怕唔吉利。

落成後一半出租

中環甲級商廈供不應求,上商依家嘅總部未用盡地積比率,Lincoln話買埋隔籬大廈再起過,5年後先起好,到時仲可以租番一半出去。點解咁捨得?佢話新總部起好後有成14萬方呎,地方闊落,依家中環租金貴,自己唔捨得用,會租一半出去,反而有部分辦公地方會搬去觀塘及尖沙咀等地區。

Lincoln回憶當時買隔籬大樓之後冇幾耐就發生金融海嘯,買完後個價係咁跌,好彩依家升番晒,而且仲撞啱政府話將旁邊嘅西座政府大樓重建做新甲廈,更加帶旺呢頭嘅物業。

余絲韻

Money18新功能「18好路數」為你預測心水股票升跌機會率