日前三大電訊商公布八月份上客數據，只有中電信（00728）嘅增長放緩，搞到尋日佢哋嘅股價跑輸於兩大對手，唔知董事長王曉初會唔會唔高興呢？不過中電信最近喺《2010年度國際ARC大獎》中就獨攬7項金獎，除咗贏到開巷，更創出中國企業奪金數目嘅紀錄，成為大贏家，雖然今日中秋節未必欣賞到七星伴月，但有七金伴中電信，相信王總必定高興番晒。
話說呢個有「年報奧斯卡頒獎禮」稱譽嘅《國際ARC大獎》已有24年歷史，係目前全球最大型及最具代表性嘅年報評選，今年共有來自27個國家、超過1,900本年報參加評選，絲絲記得之前都同大家介紹過，中電信年報特別引用咗最新嘅增強實景（Augmented Reality）科技，為讀者提供動感嘅3D體驗，絕對夠潮，難怪今次喺行業中勇奪整體年報、互動電子年報、內頁設計、印刷製作等7項金獎，如果大家未睇過呢本新年報，就不妨睇吓係咪真係咁勁！
余絲韻