絲絲講場：大酒店「回歸」上海
香港上市公司呢排興講回歸，尋日派成績表嘅大酒店（00045）亦「回歸」上海，不過唔係回歸A股市場，而係回歸上海嘅酒店市場。話說大酒店與盛高置地（00337）各持一半股權嘅上海半島酒店下周正式開幕，大酒店董事總經理及行政總裁郭敬文話，集團喺闊別上海超過半世紀後再度回歸呢個業務發源地。
半島開P賀開幕
香港酒店公司喺一九二三年收購上海大酒店控股權，成立咗香港上海大酒店，喺上世紀二十年代初，上海4間頂級酒店都係由上海大酒店經營，包括依家由錦江酒店（02006）持有嘅和平飯店。至三、四十年代，隨着時代及戰爭洗禮，大酒店喺上海嘅酒店有啲易手，有啲被清拆，自此大酒店就絕迹上海。
事隔55年，大酒店重返上海，自然要隆重其事，大酒店嘅靚公關話畀絲絲知，下周酒店開幕當日會由朝到晚舉行Party，大股東米高嘉道理家族會全體出動，另外仲會請嚟中港兩地紅星包括黎明，到時一定星光熠熠。
余絲韻