如果大家有追蹤筆者嘅文章，早期我都講過日本減息係「逆向思維」嘅模式，因為佢唔敢帶頭加息，驚畀全世界大國話佢，加上美國耐唔耐又話準備印銀紙，大家都期待新一輪「股市幻象」出現嘅時候，阿爺「無聲勝有聲」咁加番0.25厘，正式向全世界講聲，中國邁向強國新紀元，真係要向阿爺致敬。
大家都知，中國面臨「資產泡沫」嘅問題係唔可以講笑，加息喺傳統經濟學嚟講，當然希望可以拖一拖通脹同埋資產價格上升，認真用心良苦。中國加息將成為一招好好使嘅「吸資大法」，調整係一件好事，但調唔調到你同我想見到嘅位，又係另一件事。
其實加息對港股後段都仲係有利，睇真啲，今次調高定存息率，但活期存款率又冇變，內需嘅大浪仍然係維持不變，調整過後，人仔升值概念又會成為下轉炒鑊勁嘅主題概念，資源同政策股又會發惡，留意吓啦！喺調整市，都係一句「炒股唔炒市，除非玩期指」。
正如之前提到，每一隻股票就好似一個女仔一樣，你一定要擁有一顆「多情又花心嘅心情」去投資，有一啲股票，你要好似聽哥哥嘅金曲一樣──為你鍾情，永不分離；又有一啲股票要「拒絕再玩」！
筆者曾寫過TCL通訊（02618），由推介至今升幅已經超過55%（我走去睇間公司係因為相信流動商貿正式歸位），記住買股票一定要買有勢嘅股，當然要配合大主題啦，如果唔係就好大鑊。至於TCL通訊，梗係「為你鍾情，傾我至誠」啦！同佢繼續跳舞，OK？
香港大學電子金融服務榮譽助理教授 徐燦傑（作者為註冊持牌人士）