本文重點
絲絲有番咁上下江湖地位，紀念品平日真係收唔少，可惜好多一係就粗製濫造，浪費地球資源；一係就太貴重，清廉嘅絲絲只能婉拒好意。不過今日收到恒地（00012）嘅紀念品，精美皮盒內係一支二○○六年法國紅酒，上面嘅標籤及招紙竟然係恒地自己嘅Logo，唔通恒地主席李兆基（四叔）去年身家大漲後，買咗個法國葡萄園同酒廠慶祝？
貼公司Logo 四叔讚好
原來呢個係恒地公關部諗到嘅新一年VIP紀念品，由恒地向一家法國酒廠入貨，到港後改貼自己公司嘅Logo奉客，支酒仲兼具5大優點：（1）大收宣傳功效；（2）價錢唔貴，避免送畀高官時面對收禮嘅價值尷尬；（3）響應港府要推動香港發展為紅酒港；（4）靚靚皮盒係用環保回收物料製造；（5）當然係最實際嘅用途，收藏或飲落肚啦。
據悉四叔第一次見到呢件紀念品就非常鍾意，而且酒質唔錯，之後每次見完重要賓客都會送上一支，並下令喺恒地重要活動時，作為送畀達官貴人嘅小禮物，唔少高官收到後都大讚有心思。
樽上招紙印住嘅係維港景色，上面當然有恒地總部國金中心，並印有「限量版」字樣，據悉來貨只有數百支，一定要好似絲絲咁有身份地位先至可以擁有。絲絲下次見到四叔，希望可以請佢喺樽上簽名，支酒自然升價十倍。
余絲韻