本地魚缸早段未見有太大反應，恒指更在高開後迅速回落至19,681點低位整固。隨住午後祖國魚缸愈彈愈有，本地魚缸下半場回升，恒指散場收報19,922點，升131點，國指則升1.3%或145點，收報11,345點。不過成交繼續縮水，又回落至不足600億元，過埋聽日放農曆新年長假，祖國假期更長達一星期，至廿二日才復市，缸邊友普遍觀望，又或者輕裝上路，無人願意揸重倉過年。

屋仔前景看法分歧

重磅股隔晚在花旗掛牌的ADR全線上揚，不過藍色大隻佬昨日未見全面上升，幸而孭重飛的大笨象（00005）止跌靠穩，反彈0.9%，以80.05元收市。祖國移動（00941）近日跟魚缸相反走，昨日逆市下跌1.3%，收報74.95元。

對於本地屋仔市場今年如何發展，斷估專家持兩方面睇法，好友指在低息環境及買家供樓能力上升的支持下，屋仔市場只會稍作調整，而唔會大跌。但昨日測量師學會會長卻預期，由家陣至年中，屋仔價格可能跌一成，因為息率及美元或上升。日前連超人愛將「趙樓神」都話屋仔市場升勢有點唔尋常，本地地主昨日略為跑輸大市。

歐洲信貸危機現曙光，美匯指數重返80之下，「油魔」精神番些少，連帶商品期貨價格亦回升。金礦股及金屬股普遍向上，其中鞍鋼股份（00347）昨升近2%，收報13.58元，公仔圖表近日兩次下試13元即反彈，可見在該水平有頗強支持。

另一方面，祖國的鋼鐵行業重組料加速，工業和信息化部日前表示，工信部將加快鋼鐵行業重組，「鼓勵發展3至5家大鋼企」，取締唔夠規模的小型鋼鐵企業。在可以留低的大型鋼企名單上，包括鞍鋼阿媽，即係話今年鞍鋼將加快購併其他中小型鋼企，鞍鋼獲注資的機會較多。

祖國鋼鐵工業協會公布的數據顯示，○九年包括鞍鋼母公司鞍鋼集團在內的5家龍頭鋼企合計產鋼1.65億噸，佔同期全國鋼產量29%，僅提高0.5個百分點，離國務院提出的「到二○一一年，五大鋼企產鋼佔45%」的目標差距頗大。即係話鞍鋼跟其餘四大鋼企，為達到做大做強目標，加快業內重組已迫在眉睫。

行業整合強者愈強

其實睇番由一月至今短短個多月，整個鋼鐵板塊已經下跌超過15%，主要受到國家宏觀調控政策對於房地產投資或縮減的擔憂所影響。古勝則認為鋼鐵行業基本面目前並未有改變，大型基建項目仍進行得如火如荼，市場反應有點過敏。

隨住鋼材價格在第二季或有所上升，料鋼鐵股的盈利續有改善，鞍鋼作為業內五強，調整至目前水平，已值得吸納。

古勝