本文重點
經濟好轉，各類資產價格都被搶高，地產代理老友同Vincent講，西區寶翠園由於車位比例較住宅少好多，所以車位向來係「皇帝女唔憂嫁」，唔少買家就算畀得起錢都未必有業主願意放賣，啱啱屋苑有個雙號車位就以162萬元賣出，不但打破去年底L5一個雙號車位所創148萬元嘅屋苑紀錄，相信可成為全區車位做價嘅新指標。
除咗車位之外，最近公屋做價都不斷咁升，之前長沙灣李鄭屋邨有公屋單位以超過178萬元天價賣出，原來上個月登記嘅個案當中，有幾個屋苑都創咗歷史新高，好似黃大仙東頭邨祥東樓有個低層23號屋以150萬元賣出，而藍田德田邨德瑞樓亦有一個高層11號室以133萬元成交，兩個單位成交價都係創咗屋苑歷史新高。
時代廣場去年生意升8%
零售市道暢旺，商場生意理想，九倉（00004）旗下時代廣場總經理凌緣庭同Vincent講，銅鑼灣時代廣場去年營業額61.8億元，按年升7%至8%，數字比預期理想，當中十二月更加係去年最旺嘅一個月，平均每方呎營業額約1,700元，按年升15%。目前商場出租率近100%，平均呎租約50至420元，客源中約三成為遊客，大部分係內地客。
另一方面，一田百貨常務董事莊偉忠話，沙田一田商場去年營業額按年增加5.8%，春節期間的人流及營業額預料會增加超過10%。
（Vincent Lau）