鄭潔做封面當埋廣告

最簡單嘅「通告式」業績大家都睇到慣，但安踏就好細心，佢哋份業績報告不但有成62頁咁長，媲美好多藍籌公司，仲圖文並茂加埋公司代言人嘅相，包括中國乒乓球好手王皓、網球好手鄭潔等，底版人物係另一網球名星珍高域（Jelena Jankovic），加埋封面嘅鄭潔就好似喺雙打比賽中並肩作戰。睇嚟安踏隊Team除咗做品牌設計叻之外，做平面設計都好掂。

絲絲打電話去問點解呢份業績報告咁有心思，原來係佢哋開會時「腦震盪」諗出嚟，至於點解搵兩位「網球雙嬌」做封面及封底，原來安踏喺今年四月已搵咗珍高域及鄭潔做代言人，兩人除咗會穿上安踏品牌嘅網球服飾比賽，亦有份幫手設計以佢哋為名嘅網球鞋添。

內地體育用品商競爭咁激烈，安踏最大嘅競爭對手李寧（02331）已開拓乒乓球及羽毛球用品市場，安踏當然亦不能怠慢，即刻開拓網球用品市場。

余絲韻