張智霖諗過出家:但我心浮氣躁

篤信佛教的張智霖(Chilam),原來曾考慮短期出家,不過他自嘲心浮氣躁,即使禁語數天亦未必「達標」。又大爆兒子「牙尖嘴利」,已勝過母親袁詠儀!

藝人Chilam及肥媽前晚到機場博覽館,為佛教活動擔任表演嘉賓。身為佛教徒的Chilam坦言諗過短期出家:「但我覺得依家仲係心浮氣躁,所以時機未到。其實即使要試三日禁語都好似好難,試吓一日唔玩手機先。」

追唔到袁詠儀

他坦言除了今年遊歷不丹外,與家人亦到過不少佛教聖地:「包括尼泊爾同印度,我仲到過真正嘅菩提樹下。(囝囝跟埋去?)佢三個月大時因為有個寧波車圓寂,佢已經跟咗我哋去尼泊爾加德滿都。(有佛緣?)佢好細個聽經已坐定定。」

提到太太袁詠儀於社交網站發文,否認與他當眾吵架,Chilam說:「我哋平日為芝麻綠豆嘅事都會嘈,始終係兩個人嘛,不過嗰日又真係冇鬧交。睇嗰啲相知道佢平日行得好快,所以大家成日問當初係咪我追佢,依家真相大白啦,我點追得到佢呢?」

兒子牙尖嘴利

他又打趣指自己有潛質做律師:「我鬧交一啲都唔輸蝕,只係有時覺得嘈嚟無謂,咪由得佢囉。(阿仔有冇遺傳?)佢真係唔差㗎,佢阿媽已經唔夠佢講。佢好有道理,有時對住佢我都語塞。」並指12歲的兒子似大人,兩父子關係似好友。