裕美唔接受異地戀 預告撇老外男友
30歲歌手裕美去年與意大利籍男友Alex撻着後，經常在社交網放閃，不過最近傳她背男友姣溝林作，日前她接受訪問時，對傳聞得啖笑，但提到與老外男友的戀情，她似預告會分手：「其實近排都少見，佢依家成日唔喺香港。」並指不接受異地戀：「我唔係要成日黐住，但可能我成長背景問題，由細到大好驚人哋離開我，細個要捉住表哥、表姐手指瞓覺，所以我知自己係冇可能異地戀。（好似唔抱希望？）人大咗順其自然。」
想再婚生B
兩年前離婚的她依然相信愛情，更希望再婚生B，她說：「我喺破碎家庭長大，最希望有個完整嘅家，因為冇，所以我要有。經歷咗咁多我都有所領悟，坦白講上一段婚姻我係為結而結，因為我好想，但其實唔得。」
預咗要抉擇
裕美坦言離婚後沒留下陰影：「好多人問我驚唔驚結婚？其實每個經歷令我更明白自己有咩唔好，有咩我係想要。你問我依家呢個男友係咪到最尾？我唔會答你係。以前一拍拖就諗結婚，但我依家唔會，尤其經歷咁多嘢點知！我都話我唔可以Long Distance（遠距離），話唔定唔知幾時唔得，尤其你同外國人一齊，你預咗有一日要抉擇，一係跟佢去第二度，一係就算。」
場地：DrAdvanceSkin