林作嬲爆怒插袁彌明呃Like

「十優港姐」麥明詩早前在節目中談及兩性平等的話題，擔心隨年紀增長令「競爭力」下降，又擔心他日老公有外遇等情況，期間一時感觸落淚而引起網上討論。

前藝人袁彌明即時藉機抽水，以「女人30歲開始Depreciate（貶值），男人30歲開始Appreciate（漲價）」為題，並寫道：「當十優港姐遇上一個連頭髮都梳到亂糟糟、分手後仲不斷抽前女友水宣傳的西環契弟，對愛情婚姻悲觀也難怪。」繪影繪聲暗寸林作是契弟，此話一出林作即在網上「回敬」對方：「Errr excuse me, do I even know you（唔好意思，我識你咩）？！」並Tag自己住在中環，再窒對方經常抽水。

「有人出錢利誘」

對於被指做契弟，林作已經(慶)爆，接受電話訪問時更餘怒未消，炮轟袁彌明莫名其妙，擺明呃Like及抽水，好無聊！他氣憤說：「半年前新聞仲講，今次學識遇到無理指控要為自己發聲，因為我每次都唔答感情事，就畀人斷章取義。我自己從來都冇講人，亦唔會無啦啦攻擊人，我係惹火，唔係惹人火，亦都唔係開火！我好無奈，已經唔係第一次，成日被利用成為炒作目標，甚至有人出動錢做利誘！」

麥明詩：冇少忽肉

事件中另一主角麥明詩被問是否覺得被抽水？她說：「我冇諗呢啲嘢，總之自己冇少忽肉就算。（舊愛林作被指抽你水，會唔會覺得佢好慘？）其實我都感同身受，有時啲嘢唔係特別想講，但人哋問先答一兩句，但出到嚟搞到我好似自爆、自己想講咁。」另麥明詩昨日出席活動，再提到林作的網上罵戰源頭是她在節目中感觸落淚，她澄清是覺得找到白頭到老的伴侶很難，一時唏噓才喊。對於林作，她說：「我都有留意近排記者問到佢都冇答，咁樣幾好，所以我都會倣效佢唔答咁多。」

文：名人組