李蘊提早出寫真避戰o靚模
李蘊昨日與一眾師弟妹出席康和堂旗艦店開幕活動，她透露將於今個星期起程到馬來西亞拍攝寫真，她說：「應該逗留三、四日，預計喺六月出書。（唔喺書展出，避o靚模同內地女藝人競爭？）公司話今年好多人都提前喺六月出。（有咩招數同人撼？）冇得撼，自己唔係Sell身材，上年嗰本已經係我底線，今次會有沙灘同比堅尼，主力Sell腳。（點Keep靚對腳？）唉，我早幾日去郊外玩畀蚊咬到一粒粒，希望快啲好番。我最驚去當地曬黑晒，返嚟變咗舊黑炭，睇相師傅話我曬黑就會成個人都黑，惟有到時搽多啲防曬。」
另外，她的師妹陳鈺芸被問到近期內地女藝人殺入香港搶本地女星飯碗的現象，她說：「係良性競爭。（佢哋好搏？）我都好搏，可以接受健康性感，有機會都想出寫真，底線係比堅尼。（背部全裸？）如果影得靚都OK。」她透露稍後將到菲律賓拍攝旅遊書，問她會否驚香港人罷買？她說：「我再考慮吓，不過我未去過當地，想親身感受當地嘅風土人情。」
