志雲傾掂數 有尊嚴離無綫
陳志雲復職數天，內部即流傳他復職純為辭職而鋪路！涉貪案迄今八個月，陳總命脈「玩弄」於一班股東之手，令他心淡同時深感此地不宜久留，遂與股東傾掂數——待處理好廉署一案便光榮引退，此一條件正合股東心意，無綫始安排陳總風光在台慶前復職。
無綫總經理陳志雲昨早八時五十分返抵電視城上班，笑面迎人企定任影，對有關赴美傾「四大」及節目《生死之交》會於無綫播出之說，他只笑不答。
近日有關陳總辭職之流言四起，據無綫一幕後高層透露，志雲為無綫服務期間有功有勞，惟他與方逸華及股東們之間的關係千絲萬縷，傳聞多多，以致早前陳總復職不成反被廉署落案起訴。猶幸陳總EQ高面對妥當才未至失禮人前，惟陳總有感尊嚴價更高，看通無綫此地不宜久留，不屑成為股東鬥爭下的犧牲品，故復職前作出談判，願意以辭職換取尊嚴，復職後處理好廉署一案便風光離開。股東為圓陳總心願，遂安排他強勢復職。
台慶日等睇好戲
今日為無綫台慶，主席邵逸夫和副主席及董事總經理方逸華將集齊慶祝，當他們面對陳總，而他又要面對一班涉案證人，一干人等如何交戲是一眾高層「等睇戲」的高潮位，更有高層帶笑互選無綫「視帝」、「視后」就是陳志雲和方逸華二人。
「視帝」大熱之一黎耀祥昨日就此事笑說：「陳總係風雲人物，我輸畀佢心甘命抵！」祥仔其實與陳總關係要好，他復工當然開心，並坦言無綫應該認同其價值，問到以證人身份面對陳總可會尷尬？祥仔說：「冇乜特別尷尬，台慶見到陳總，我都好想當面打個招呼問候吓佢，只要唔傾個case就冇影響。」志雲「best friend」寧進則勁開心好友復工，除了SMS外等緊對方請食飯！問寧進可會復職？他說：「我都係咁諗，順其自然，依家少咗無綫份人工，經濟都有壓力o架！」
陳總回歸後連日來有傳他要翻舊帳，據知他這幾天忙於跟進行政上工作，根本冇閒情向藝員復仇，一位不願透露姓名的高層說：「係『處理』都係佢嘅敵對李寶安、區偉林同樂易玲，陳總當下職務係傾『四大』問題，不過，賣盤一事仍hold住。」
廖碧兒三喊無辜
被指是「離雲派」的廖碧兒甚覺委屈，昨日她作出平反，更三度說自己無辜：「唔明點解話我埋樂易玲堆，我兩邊都合作得好好，以前我都有為陳志雲做《冰天動地》。（但你話冇打電話畀佢，要劃清界線喎？）唔明點解要咁講，電話我係冇打，但我有SMS佢。（有冇覆你？）私人嘢唔方便講。（怕人話你死撐？）我冇死撐，係畀人話得緊要先出聲。（瞓唔着？）又冇，我中文唔好，係阿爸阿媽讀番報紙畀我聽，阿爸都有問我呢件事。」
文：影視組